គ្រួសា​រ​រង​គ្រោះ​ដោយ​ភ្លើង​ឆេះ​ផ្ទះ​ នៅ​ស្រុក​សាម​គ្គី​មាន​ជ័យ​ បាន​ទទួល​អំណោយ​ពីសាខា​ និង​អនុ​សាខា​កាក​បាទក្រហម​

កំពង់ឆ្នាំង ៖នាព្រឹកថ្ងៃទី២ ខែឧសភា ឆ្នាំ២០២៥ ឯកឧត្តម ស៊ុន សុវណ្ណារិទ្ធិ ប្រធានគណៈកម្មាធិការសាខា បានចាត់ឲ្យ លោកស្រី ប៊ន សុភី អនុប្រធានអចិន្ត្រៃយ៍គណៈកម្មាធិការសាខាកាកបាទក្រហមកម្ពុជា ខេត្តកំពង់ឆ្នាំង លោក ប្រាក់ សោភ័ណ្ឌ នាយកសាខា និង លោក ឈួន ចាន់ណា ប្រធានគណៈកម្មាធិការអនុសាខាកាកបាទក្រហមកម្ពុជា ស្រុកសាមគ្គីមានជ័យ ចុះសួរសុខទុក្ខ និងនាំយកគ្រឿងឧបភោគបរិភោគ ចែកជូនគ្រួសាររងគ្រោះដោយអគ្គិភ័យកាល់ពីថ្ងៃទី១ ឧសភា ២០២៥ ចំនួន ១គ្រួសារ នៅភូមិខ្នារទៃមោក ឃុំក្រាំងល្វា ស្រុកសាមគ្គីមានជ័យ ។

នៅក្នុងឳកាសនោះ លោកស្រី ប៊ន សុភី អនុប្រធានអចិន្ត្រៃយ៍គណៈកម្មាធិការសាខាបានពាំនាំការសួរសុខទុក្ខពីសំណាក់ ឯកឧត្តម ស៊ុន សុវណ្ណារិទ្ធិ ប្រធានគណៈកម្មាធិការសាខា ជាពិសេស សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដោយបានចូលរួមសោកស្ដាយចំពោះការខូចខាត ព្រមទាំងបាត់បង់វត្ថុមានតម្លៃក្នុងគ្រោះ អគ្គិភ័យនេះដែលជាកម្លាំងញើសឈាមរបស់បងប្អូនប្រជាពលរដ្ឋខិតខំរកបានដោយការងារសុចរិត ។

លោកស្រី ប៊ន សុភី បានបន្តថា សូមកុំឲ្យបងប្អូន មានការអស់សង្ឃឹម ព្រោះគ្មាននរណាម្នាក់ចង់ឱ្យហេតុការណ៍នេះកើតឡើងនោះទេ ដូច្នេះសូមបន្តតស៊ូខិតខំ ប្រឹងប្រែងបន្តទៅមុខទៀត ដើម្បីគ្រួសារមានជីវភាពល្អប្រសើរឡើងវិញ ។

សម្ភារដែលបានចែកជូនគ្រួសាររងគ្រោះ រួមមាន ១,សម្រាប់សាខា អង្ករ ២៥គីឡូក្រាមមី១កេះ ត្រីខ ១០កំប៉ុង ឃីត១កញ្ចប់( មុង១ ភួយ១ សារុង១ ក្រមា១) តង់ធំ១ សម្ភារផ្ទះបាយមួយចំនួន ឃីតធំ១ និងថវិកា ចំនួន២០០,០០០រៀល។ ២/,អនុសាខាស្រុក អង្ករ ៥០គីឡូក្រាម មី ១កេះ ត្រីខ ១០កំប៉ុង, មុង១ ភួយ១ សារុង១ ក្រមារ១ កន្ទេល១ សម្ភារផ្ទះបាយមួយចំនួននិងថវិកា ចំនួន២០០,០០០រៀល រួមជាមួយថវិកាឃុំក្រាំងល្វា ចំនួន ៦០,០០០រៀល ។ជាមួយគ្នានោះដែរ ឯកឧត្ដម ស៊ុន សុវណ្ណារិទ្ធិ ប្រធានគណៈកម្មាធិការសាខា បានសន្យាសាងសង់ផ្ទះថ្មីជូនគ្រួសាររងគ្រោះផងដែរ ៕