ឯក​ឧត្ដម​នេត្រ​ ភក្ត្រា​ មាន​ប្រសាសន៍​ថា​ ហ្វេស​ប៊ុក​ និង​តិក​តុក​ គឺជា​បណ្ដាញ​ទំនាក់​ទំនង​សង្គម​ដ៏​សំខាន់​ ក្នុង​ការ​ចែក​ចាយ​ព័ត៌​មាន​ ទាំង​ពិត​ និង​ក្លែង​ក្លាយ​

ហ្វេសប៊ុក និងតិកតុក គឺជាបណ្ដាញទំនាក់ទំនងសង្គមដ៏មានប្រជាប្រិយភាព និងសំខាន់ ក្នុងការចែកចាយព័ត៌មាន ដែលក្នុងនោះមានទាំងព័ត៌មានពិត និងក្លែងក្លាយ ជាហេតុធ្វើអោយអ្នកប្រើប្រាស់ទូទៅ ជាពិសេសយុវវ័យពិបាកបែងចែករវាងព័ត៌មានពិត និងមិនពិត ។នេះជាប្រសាសន៍លើកឡើងរបស់ ឯកឧត្ដម នេត្រ ភក្ត្រា រដ្ឋមន្ត្រីក្រសួងព័ត៌មាន នៅក្នុងពិធីបើកយុទ្ធនាការ «និយាយថាទេចំពោះព័ត៌មានក្លែងក្លាយ- Say No to Fake News» នាព្រឹកថ្ងៃទី០១ ខែមេសា ឆ្នាំ២០២៥ នៅទីស្តីការក្រសួងព័ត៌មាន ។

នៅក្នុងឱកាសនោះ ឯកឧត្ដមរដ្ឋមន្ត្រី បានមានប្រសាសន៍ថា ព័ត៌មានក្លែងក្លាយ គឺជាបញ្ហាចំបងដែលបន្តកើតមានជារៀងរាល់ថ្ងៃ ធ្វើអោយប៉ះពាល់ដល់ជំនឿទុកចិត្តពីមហាជន និងបង្កជាភាពចលាចលក្នុងសង្គម ។ ឯកឧត្ដមបញ្ជាក់ថា បច្ចុប្បន្នហ្វេសប៊ុក និងតិកតុក បានដើរតួយ៉ាងសំខាន់បំផុតក្នុងការចែកចាយព័ត៌មាន លឿន រហ័ស ប៉ុន្តែយ៉ាងណាក៏ដោយ វាក៏ជាបណ្ដុំនៃព័ត៌មានក្លែងក្លាយផងដែរ ពោលគឺមានទាំងព័ត៌មានពិត និងក្លែងក្លាយ នៅលាយឡំគ្នា ធ្វើអោយអ្នកប្រើប្រាស់ភាគច្រើនជាពិសេសយុវវ័យ ពិបាកបែងចែករវាងព័ត៌មានពិត និងក្លែងក្លាយ ។

ឯកឧត្ដម នេត្រ ភក្ត្រា បានសង្កត់ធ្ងន់ថា ព័ត៌មានក្លែងក្លាយដែលគេបង្កើតឡើងមានចរិតញុះញង់ បំផ្លាញសង្គម កេញចំណេញនយោ
បាយ ធ្វើអោយមានការយល់ច្រឡំ ។ ដូច្នេះហើយ យុទ្ធនាការ «និយាយថាទេចំពោះព័ត៌មានក្លែងក្លាយ- Say No to Fake News» មានគោលបំណងផ្លាស់ប្តូរឥរិយាបទ របស់ប្រជាជន ដែលជាអ្នកប្រើប្រាស់បណ្តាញទំនាក់ទំនងសង្គម និងប្រព័ន្ធផ្សព្វផ្សាយ ទំនើប ដើម្បីទប់ស្កាត់ការរីកសាយភាយនូវព័ត៌មានក្លែងក្លាយក្នុងសង្គមកម្ពុជា សំដៅធានាឱ្យបាននូវសន្តិសុខព័ត៌មាន ដែលសន្តិសុខព័ត៌មាននេះ គឺក្រសួងព័ត៌មាន ផ្តោតទៅលើគោលសំខាន់៣ ទី១៖ ធានាសិទ្ធិទទួលព័ត៌មានរបស់ប្រជាពលរដ្ឋ, ទី២៖ គុណភាពព័ត៌មាន ផ្តល់ជូនប្រជាពលរដ្ឋ ទី៣៖ សុវត្ថិភាពព័ត៌មានសម្រាប់ប្រជាពលរដ្ឋប្រើប្រាស់ កិច្ចការងារនេះ គឺជាការរួមចំណែកដល់ការពង្រឹងសន្តិសុខ និងស្ថិរភាពសង្គម ៕