ឯក​ឧត្តម​រដ្ឋ​មន្ត្រី​ក្រសួង​ព័ត៌​មាន​ អនុ​ញ្ញាត​ជូន​ប្រតិភូ​ ITU​ ចូល​ជួប​ពិភាក្សា​ការ​ងារ​

ឯកឧត្តម នេត្រ ភក្ត្រា រដ្ឋមន្រ្តីក្រសួងព័ត៌មាន ទទួលជួបពិភាក្សាការងារ និងតម្រង់ទិសនៅក្នុងការរៀបចំគោលនយោបាយជាតិស្តីពីការផ្លាស់ប្តូរការផ្សាយពីប្រព័ន្ធអាណាឡូកទៅឌីជីថល ជាមួយក្រុមការងារបច្ចេកទេសជាន់ខ្ពស់របសសហពន្ធ័ទូរគមនាគមន៍អន្តរជាតិ ITU។

កិច្ចពិភាក្សាការងារនេះបានធ្វើឡើងនារសៀលថ្ងៃទី២៥ ខែកុម្ភៈ ឆ្នាំ២០២៥ នៅទីស្តីការក្រសួង រវាងឯកឧត្តម នេត្រ ភក្ត្រា រដ្ឋមន្រ្តីក្រសួង​ព័ត៌មាន ជាមួយក្រុមការងារបច្ចេកទេស ជាន់ខ្ពស់របសសហពន្ធ័ទូរគមនាគមន៍អន្តរជាតិ ITU ដែលមានអ្នកជំនាញពីររូបគឺ លោក GARDIYAWASAM AMAL DARSHANA និងលោក SYED AAMIR ។

យោងតាមសំណើរបស់ក្រសួងព័ត៌មាន តាមរយៈក្រសួងប្រៃសណីយ៍ និងទូរគមនាគមន៍ ជូនទៅសហពន្ធ័ទូរគមនាគមន៍អន្តរជាតិ ITU បានបញ្ជូនក្រុមការងារបច្ចេកទេសជាន់ខ្ពស់ មកជួបពិភាក្សាការងារជាមួយ ឯកឧត្តម រដ្ឋមន្ត្រីនេត្រ ភក្ត្រា និងក្រុមការងារបច្ចេកទេស
របស់ក្រសួងព័ត៌មាន ដើម្បីរៀបចំគោលនយោបាយអភិវឌ្ឍន៍ទូរទស្សន៍ ឌីជីថល កម្ពុជា ។

ឯកឧត្តម រដ្ឋមន្ត្រី នេត្រ ភក្ត្រា បានស្នើដល់ សហពន្ធ័ទូរគមនាគមន៍អន្តរជាតិ ITU ធ្វើការពិនិត្យឡើងវិញទៅលើការជំរុញរៀបចំផែនការយុទ្ធសាស្រ្ត គោលនយោបាយ ដើម្បីវាយតម្លៃលើការផ្សព្វផ្សាយឌីជីថលបច្ចុប្បន្ន និងការត្រៀមខ្លួនសម្រាប់ការផ្លាស់ប្តូរប្រព័ន្ធផ្សព្វផ្សាយពីអាណាឡូក ទៅទូរទស្សន៍ឌីជីថល ។ ជាមួយនេះជួយពិនិត្យរៀបចំគោលនយោបាយគាំទ្រដល់វិស័យឯកជន និងអ្នកពាក់ព័ន្ធផ្សេងៗទៀត ពិសេសធ្វើយ៉ាងណាជំរុញអោយការផ្សព្វផ្សាយបានគ្រប់ដណ្តប់នៅទូទាំងប្រទេស ក្នុងគោលបំណងដើម្បីលើកកម្ពស់ការទទួលព័ត៌មានរបស់​ប្រជាជនបានគ្រប់ៗគ្នាតាមរយៈព័ត៌មានប្រកបដោយគុណភាព ជំនឿជឿជាក់ និងទាន់ចិត្ត ។

គួរបញ្ជាក់ដែរថា ក្នុងពេលថ្មីៗកន្លងមកនេះ នាយកសហពន្ធ័ទូរគមនាគមន៍អន្តរជាតិ (ITU) ប្រចាំតបន់ Asia and Pacific តាមរយៈ វិទ្យាស្ថានតំបន់អាស៊ី-ប៉ាស៊ីហ្វិកដើម្បីអភិវឌ្ឍប្រព័ន្ធផ្សព្វផ្សាយ AIBD អញ្ជើញមកសិក្សាស្វែងយល់ពី មធ្យោបាយសម្រាប់កិច្ចសហប្រតិបត្តិការជាមួយក្រសួងព័ត៌មាន ដើម្បីរួមគ្នាពង្រឹងប្រព័ន្ធផ្សព្វផ្សាយនៅកម្ពុជា ដែលនឹងឈានឆ្ពោះទៅការផ្លាស់ប្តូរប្រពន្ធ័ផ្សាយពី អាន់ណាឡូក ទៅ​ប្រពន្ធ័ឌីជីថល ៕